Ginkumpirmar sang Iran nga naghimo ini sang missile strike sa Al Udeid Air Base sa Qatar, isa ka mayor nga instalasyon sang militar sang Estados Unidos, bilang balos sa mga airstrike sang Amerika sa mga pasilidad nukleyar sang Iran sang nagligad nga semana.
Antes ang pag-atake, ginpahibalo sang Iran ang gobyerno sang Qatar nga ila atakehon ang base militar sang US.
Katuyuan sang nasambit nga abiso nga malikawan ang daku nga kahalitan.
Ginkondenar sang Qatar ang pag-atake sang Iran, kag gintawag ini nga paglapas sa ila soberanya kag kahawaan.
Ginpahayag sang isa ka mataas nga opisyal sang militar sang Estados Unidos nga humalin sang nagligad nga semana ginkakas nila ang mga fighter jet sang Estados Unidos sa Al Udeid Air base sa Qatar bilang kabahin sang pag-amlig sang ila mga assets gikan sa nagalala nga inaway sa tunga sang Israel kag Iran.
Ang dugang nga mga sabat gikan sa magtimbang nga bahin ginahulat samtang ang internasyonal nga komunidad nagapanawagan sang pagpugong kag isa ka diplomatiko nga resolusyon sa nagalala nga inaway.
