ROXAS CITY – Ginkadismaya sang tagdumalahan sang Teodoro Arcenas Trade Center (TATC) ang mga nabaton nga reklamo natuhoy sa mabaho kag barado nga septic tank partikular sa fish section nga manugtapos palang sa pagrenovate ukon pagpakay-o.
Sa interview sang Bombo Radyo kay Mrs. Heloise Mendoza, TATC administrator, iya ginpahayag nga kasubong kanugon lang ang pagpanikasog ni Mayor Ronnie Dadivas nga mapanami ang merkado publiko kun pabay-an malang sang fish vendors.
Suno diri, madamo na sila sang nabaton nga reklamo gikan sa manugbakal kag pila man ka vendors sa TATC nga tuman ka baho sa bahin sang fish section kag ginapahayag bangud ini sa iresponsable nga paghaboy sang basura sang mga vendors sa sulod sang merkado amu man sa drainage nga nagakadto sa septic tank rason nga nagabara kag nagabaho ini.
Bangud diri, nag-implementar ang tagdumalahan sang TATC sang hugot nga pagpanglimpyo kun sa diin nagpatigayon kaina sang aga sang clean up drive sa fish section.
Ginsiguro ni Mendoza nga mamentinar ini kag magamonitor sila sa bilog nga merkado, kun sin-o man ang wala nagahimos sang ila basura pagahatagan sang citation ticket kag penalidad nga indi magnubo sa P500, kun indi madala sa penalidad kag magliwat pa ini, ikanselar ang ila prebilihiyo kag dumilian na nga magbaligya pa sa TATC.
Sa pihak nga bahin, maayong balita suno kay Mendoza nga malapit nalang mahuman ang phase 2 kag matapos na ini antes magtakop ang tuig 2022 bangud man sa madasig nga pagtrabaho.
Gani luyag niya ipalab-ot sa tanan ilabi na sa kapin 200 fish vendors nga magkooperar sa ila implementasyon nga mapabilin ang katinlo kag katahom sang merkado publiko.
