ROXAS CITY – Liwat nga ginpahayag sang Amerika ang ila ironclad commitment sa Pilipinas sa idalom sang Mutual Defense Treaty (MDT).
Ini ang kasunod sang pag-istoryahanay sa telepono nanday US Secretary of Defense Lloyd Austin III kag Defense Secretary Gilberto Teodoro Jr. natuhoy sa pinakaulihi nga insidente sa tunga sang China kag Pilipinas sa Ayungin Shoal sadtong June 17.
Sa pagpakighinala sang duha kla opisyal, ila nga ginhatagan-pagtamod ang pagpabakod sang alyansa sang Estados Unidos kag Pilipinas agud suportahan ang isa ka hilway kag bukas nga Indo-Pacific.
Kalakip diri ang pagbuliganay sa mga “like-minded partners” agud mapabakod ang skills sang Armed Forces of the Philippines, kag mag-invest sa U.S. rotational force posture sa idalom sang Enhanced Defense Cooperation Agreement. Ginalauman man ang pagpakig-isa sang duha ka magka-alyado nga pungsod sa Two-Plus-Two (2+2) Defense and Foreign Affairs Ministerial Consultations sa masunod nga bulan.
