Isa patay samtang duha naman ang pilason matapos nagbungguanay ang isa ka motorsiklo kag tricycle sa Barangay Agkilo, Panitan, Capiz.
Sa interview sang Bombo Radyo Roxas kay Police Captain Ronald F. Ton-Ogan, officer in charge sang Panit-an Municipal Police Station, iya ginpahayag nga natabo ang insidente samtang nagabiyahe ang tricycle nga ginamaneho ni Alyas Joe, 42 anyos, vendor kag upod ang pasahero sini nga si Alyas Gen, 46 anyos lunsay mga residente sang Brgy. Cogon Panit an Capiz.
Sang pag-abot sa Barangay Agkilo, nabunggo ang motorsiklo nga gina maneho ni Alyas John 33 anyos sa likod nga bahin sang tricycle.
Nag-angkon sang patal nga pilas sa ulo kag iban nga bahin sang lawas ang motorista nga madasig gindala sa Bailan District Hospital para kuntani sa nagakaigo nga pagbulong apang gindeklarar ini nga dead on arrival sang doctor.
Gindala sang Panitan MDRR ang driver kag pasahero sang tricycle sa Roxas Memorial Provincial Hospital para sa medikal nga pag-atipan.
Base sa inisyal nga imbestigasyon, nakita sa CCTV nga madasig ang pagpadalagan sang motorsiklo antes ini nagbunggo sa likod sang tricycle.
Sa subong padayon pa ang imbestigasyon sang mga otoridad angut sa insidente
