Ginsudlan sang isa ka amay ang tanan nga sahi sang ubra para mapatapos ang iya kabataan sa pag-eskwela.
Sa interview sang Bombo Radyo kay Diosdado Evangelista, iya ginpahayag nga nangin isa ini ka security guard kag nagsulod pa gid sa nagkalain-lain nga ubra agud nga may mapakaon kag mapabalon sa iya mga kabataan sa eskwelahan.
Apang mas nagdugay ini bilang isa ka mangunguma sang bugas, tubo, cacao kag luy-a sa sulod sang madamo nga tuig agud masuportahan ang pag-eskwela sang iya apat ka kabataan tubtob nga makatapos sang kolehiyo.
Suno kay Evangelista, nangin mabudlay para sa iya apang nagpanikasog ini bangud gusto niya nga mangin madinalag-on ang iya mga kabataan sa palaabuton.
Pahayag pa niya, sang sini nga mapatapos ang iya mga kabataan, nagdesisyon man ini nga magbalik sa pag eskwela .
Wala man ini nga napaslawan bangud nakatapos ini sa kurso nga BS Agribusiness kag nangin license agriculturist.
Dugang pa sang natungdam, wala sa edad ang paglab-ot sang handum nga makatapos sa pag eskwela agud mapa uswag ang pagpangabuhi sang pamilya.
