ROXAS CITY – Isa ka armas luthang ang nakita sang mga katapo sang Pontevedra Municipal Police Station sa karsadahon sang Barangay Bailan, Pontevedra, Capiz.
Suno sa Pontevedra Municipal Police Station nga takna alas 9:45 kagab-i samtang nagapatigayon sang pag patrolya ang mga kapulisan sang nakita na lamang nila ang isa ka .38 kalibre nga armas-luthang sa karsada.
Ginapatihan nga posible nawigit ang amo nga armas luthang gikan sa isa ka wala matumod nga persona.
Sa karon, yara na sa kustodiya sang Firearms and Explosives Security Agencies and Guard Supervision (FESAGS) sang Pontevedra Municipal Police Station ang nasambit nga armas luthang kag natalana nga iga turn-over sa Capiz Police Provincial Office (CPPO) para sa nagakaigo nga disposisyon.
Nahibaluan nga resulta ini sang Tokhang Kontra Armas Luthang (TKAL) nga kampanya sang mga Kapulisan batok sa pag hupot sang illegal nga armas luthang.
