ROXAS CITY – Nagreklamo sa Roxas City Police Station ang anak sang tag-iya sang isa ka apartment matapos nga ginaalegar ginpalagyuhan sang ila nga boarder sa Hemingway Street, Barangay Tiza, Roxas City.
Ginkilala ang tagreklamo nga si Joshua Dumapig, residente sang Barangay Rizal Pontevedra, Capiz.
Sandig sa ginpabalhag sang tagreklamo sa mga kapulisan, ginaalegar sini nga nagbiya sa ila nga apartment ang boarder nga si Marielyn Baralla nga wala nakabayad sang pito sini kabulan nga renta.
Ginpahayag sang tagreklamo nga kapin P56,000 ang balayran ni Baralla kalakip na ang P4,700 nga balayran sa kuryente kag P4,836 sa tubig.
Bangud diri, ginpakamaayo na lamang sang tagreklamo nga ipabalhag sa Roxas City Police Station ang natabo nga pagpalagyo ni Baralla.
