Gintakod sa tiil sang isa ka babaye ang nabitas sini nga dalunggan bangud sa isa ka aksidente
sa Shandong, China.
Nahibaluan nga na-aksidente ang nasambit nga babaye sa ginaubrahan sini nga factory sang ginlamon sang makina ang iya buhok nga nagresulta sa pagkagisi sang iya panit sa nawong kag ulo pag pagkabitas sang iya dalunggan.
Bangud sang natabo, ginakinahanglan niya nga magpaidalom sa serye sang reconstructive surgeries.
Suno sa mga doktor, indi gilayon mahimo nga mabalik ang iya dulunggan bangud sa damage sa ugat nga nagasuplay sang dugo.
Apang agud mapataas ang tsansa nga mabalik ang napaksi nga dulunggan, gindesisyunan nga itapik anay ini sa tiil sang babaye.
Ginpili nga sa tiil ini sang babaye itapik bangud ang panit sa area ang manipis kag ang blood vessels diri ang pareho ang kadakuon sa ugat sa dalunggan gani mas mahapos ang transplant operation.
Naglab-ot naman sa 10 ka oras ang una nga operasyon.
Kritikal ang mga una nga adlaw sang transplant apang nangin estable man ang kondisyon sang pasyente.
Sa sulod sang lima ka bulan, gin-require ang babaye nga magsuksok sang halog nga sapatos kag maglakat sang mahinay agud malikawan ang pressure kag mapabilin ang sirkulasyon sang dugo.
Samtang, gilayon naman nga ginpatigayon ang operasyon agud ibalik ang dalunggan sa orihinal sini nga pwesto kag madinalag-on nga nahimo ini sang mga doktor.
