Padayon ang imbestigasyon sang Roxas City PNP sa pagsulod kag pagpangawat sang pila ka mga kagamitan sa isa ka balay sa Barangay Lawaan, sining syudad.
Nagpa-rekord sa istasyon sang pulisya ang mag-amay nga Fernando Losanta 48-anyos kag anak nga si Marvin Losanta 27-anyos matapos ginsulod sang kawatan ang ila balay kaina sang kaaganhon.
Kalakip sa mga nakuha sang kawatan ang pila ka mga kagamitan kag kuwarta.
Sandig sa imbestigasyon sang kapulisan nga nabatyagan sang mag-amay nga kasubong may iban nga tawo sa balay kag sa ila pagtsekyar nakita nila ang suspek.
Ila ini ginlagas apang bangud madasig ang iya pagdalagan, wala na nila ini maabtan.
Ginapatihan nga nag-agi sa sliding window malapit sa sala ang kawatan bangud aminado ang mag-amay nga ila nalimtan nga saraduhan ang bintana.
Apang bangud ginkulbaan man ang kawatan matapos nahibaluan sini nga nakita siya sang mag-amay nga Losanta, nabilin sang ginapatihan menor de edad ang iya bayo nga gamiton nga ebedensiya para matumod ang identity sang suspek.
Nahibaluan nga sang nagligad lamang nga adlaw, ginkawatan man ang kaingud balay sang mga tagreklamo sa diin natigayon nga mataban sang mga kawatan ang cellphone kag kuwarta.
