ROXAS CITY – Ginpaidalum sa preventive lockdown ang Barangay San Julian, Tapaz matapos nagpositibo ang isa ka katapo sang militar sa Coronavirus Disease ukon COVID-19.
Ini ang ginkompirmar ni Tapaz Mayor Roberto ‘Nonong’ Palomar sang mainterview sang Bombo Radyo.
Sa interview sang Bombo Radyo kay Palomar, isa ka 25-anyos nga suldado ang nagpositibo sa nasambit nga balatian kun sa diin tumandok ini sang banwa sang Dumalag apang temporaryo nga nagapuyo sa nasambit nga barangay.
Suno kay Palomar, nga nagpadulong sa iloilo ang nasambit nga suldado agud magpa-opera apang nakabatyag ini sang pagpalangatol sa tutunlan rason nga nagpaidalom sa COVID-19 test.
Bangud diri, ginpakamaayo na lamang sang nasambit nga alkalde nga ipaidalom sa preventive lockdown ang nasambit nga barangay sa sulod sang 14 ka adlaw agud makapatigayon sang maid-id nga contact tracing.
Ginpahayag ni Palomar nga may yara sang mga kaupdanan sa ila balay ang amo nga suldado kag nakapadulong pa ini sa Camp. Peralta sa banwa sang Jamindan, Capiz.
Samtang natalana naman nga ipaidalum sa RT-PCR test ang mga himata nga na close contact sang nasambit nga suldado.
