Isa ka botante ang nagpahayag sang iya reaksyon sa pagpalawig sang termino sang mga Barangay kag Sangguniang Kabataan ukon SK officials.
Sa interview sang Bombo Radyo kay Mr. Ian De Pedro, iya ginpahayag nga mas dapat tutukan sang mga yara sa poder ang nagapanguna nga mga problema kag pagkinahanglan sang tagsa ka barangay, ilabi na samtang ginapalawig ang ila termino.
Suno kay De Pedro, kinahanglan nga gamiton sang mga opisyal ang dugang nga tion sa paghatag sang solusyon sa mga problema sang komunidad kag sa pagpatuman sang mga programa nga direkta nga makabulig sa mga residente.
Pahayag pa niya, ang eleksyon isa kuntani ka paagi para sa mga botante nga makapili ukon makabag-o sang liderato sa ila lugar kon makita nila nga kinahanglan ini.
Dugang pa sang natungdan, importante nga mangin aktibo ang mga botante sa pagmonitor sang performance sang ila mga lider kag siguruhon nga ang ila mga kinahanglanon kag problema ginahatagan sang nagakaigo nga atensyon.
