Isa ka ka-Capiznon nga civil engineer ang ginkilala bilang isa sa mga Inspiring Filipina Engineers sa Middle East bangud sang iya kontribusyon sa engineering profession kag sa pagbulig sa mga kapwa Pilipino.
Sa interview sang Bombo Radyo kay Engr. Leonester V. Diestro, iya ginpahayag nga gindedikar ang pagkilala sa tanan nga Overseas Filipino Workers (OFWs) nga padayon nga nagapangabudlay sa iban nga pungsod kag nagaamot sa pagpauswag sang Pilipinas paagi sa ila dedikasyon kag pagkamainantuson.
Si Diestro isa ka lisensyado kag professional civil engineer nga nagabase sa Dubai, United Arab Emirates halin pa sang 2006.
Suno sa iya, sa iya kapin duha ka dekada nga eksperyensya sa propesyon, nangin kabahin siya sa pila ka project management kag construction engineering sa publiko kag pribado nga sektor, kag nangin kabahin sa pagpatukod sang nagkalain-lain nga proyekto kaangay sang hypermarkets, residential kag commercial buildings, hotels, multipurpose facilities kag urban retail infrastructures.
Nahibaluan nga ginkilala ang natungdan nga tumandok sang Ivisan, Capiz, sa ginpatigayon nga 20th International Conference of Women Engineers & Scientists (ICWES 20) kag 10th Philippine Women Engineers & Scientists Summit (PWESS 10) sang Agosto 5, 2026 sa Royce Hotel and Casino sa Clark, Pampanga.
