Isa ka kadungganan ang nabaton sang sektor sang edukasyon sa probinsya sang Capiz matapos makapasar sa National Assessment for School Heads (NASH) 2026 – Batch 2 ang isa ka manunudlo gikan sa banwa sang Pilar.
Sa interview sang Bombo Radyo kay Dr. Dolly Arroyo-Cabuquid, principal sang Dulangan National High School, iya ginpahayag nga indi ini ang una nga higayon nga nagkuha siya sang nasambit nga assessment.
Suno kay Cabuquid, sang nagkuha siya sang exam bilang kabahin sang Batch 1, nakasulod siya sa division level kag nakwalipikar kuntani para sa regional assessment.
Apang, bangud sa malip-ot nga tion sang preparasyon kag iban pa nga sitwasyon, wala siya nahatagan sang kahigayunan nga makapadayon sa sunod nga bahin sang assessment.
Dugang pa sini, sa baylo nga madiscourage sa natabo, ginpadayon niya ang iya handum nga makapasar sa NASH.
Suno sa iya, may lain nga plano ang Ginoo para sa iya, kag ang nasambit nga kapaslawan nangin inspirasyon agud magtinguha pa gid. Sang nagkuha siya liwat sang assessment bilang kabahin sang Batch 2, malampuson niya ini nga napasar.
Nahibaluan nga ang National Assessment for School Heads (NASH) isa ka assessment nga ginapatigayon sang Department of Education agud masukod ang kahandaan, kahibalo, liderato kag kapasidad sang mga school heads sa epektibo nga pagpanguna kag pagdumala sang ila tagsa ka pampubliko nga eskwelahan.
Daku man ang pagpasalamat ni Dr. Arroyo-Cabuquid sa tanan nga naghatag sang suporta, pagsalig kag pag-ampo sa iya sa bug-os nga proseso sang assessment. Suno sa iya, indi lamang ini personal nga kadalag-an kundi isa man ka pagpakilala sa padayon nga paninguha sang Dulangan National High School sa paghatag sang de-kalidad nga edukasyon.
Ginalauman man nga ang iya pagpasar sa NASH 2026 mangin dugang nga inspirasyon kag kusog sa pagpatuman sang mga programa kag inisyatibo sang Department of Education agud mapataas pa gid ang kalidad sang pagpanudlo, pagpanguna kag pagdumala sang mga pampubliko nga eskwelahan.
