ROXAS CITY-Ginpaidalom sa “Lockdown” ang isa ka compound kun sa diin gaistar ang lima ka indibidwal nga mag-pamilya nga nagpositibo sa COVID-19 sa Barangay Jagnaya, Jamindan Capiz.
Ini ang ginpahayag ni Jamindan Mayor Mac Arthur Valdemar sang mainterview sang Bombo Radyo.
Ginkompirmar ni Valdemar nga may yara sang 5 ka magpamilya nga nagpositibo sa COVID-19 sa nasambit nga barangay.
Suno sa kay Valdemar nga ginpaidalom ini sila sa RT-PCR test matapos nga may yara sang isa nila ka himata nga manugbalik sa luwas sang pungsod nga nauna nga nagpositibo sa COVID-19.
Bangud sini, ginapakamaayo sang task force nga ipaidalom sa lockdown ang ila naistaran nga compound sumugod subong nga adlaw sa sulod sang 14 diyas.
Gindugang pa ni Valdemar nga lunsay mga asymptomatic ang nasambit nga mga nagpositibo nga nagapabilin sa karon sa Municipal Quarantine Facility sang nasambit nga banwa.
Apang gin-athag ni Valdemar nga madamo man sang ila nga himata ang nagnegatibo man sa COVID-19.
Ginkalipay naman ni Valdemar nga nagakooperar man ang bug-os nga pamilya samtang ginapaidalom sa lockdown ang ila nga compound.//
Sa karon yara na sa 27 ang kabug-osan nga kaso sang COVID-19 ang banwa sang Jamindan.
