ROXAS CITY-Nagreklamo sa Roxas City Police Station ang isa ka empleyado sang isa ka bangko matapos nga ginaalegar nga ginpahog kag ginsumbag sang tatlo ka mga indibidwal sa Barangay Sibaguan, Roxas City.
Ginkilala ang biktima nga si Ronel Semicula, 25-anyos sang Barangay Carida, Hamtic, Antique apang temporaryo nga nagapuyo sa Arnaldo Boulevard, Barangay Baybay sining siyudad.
Sandig sa ginpabalhag sang tagreklamo nga samtang nagasakay ini sa motorsiklo padulong sa banwa sang Ivisan, hinali na lamang ini nga gintambangan kag ginsumbag sang mga suspek nga sanday Eric Bermejo kag mag-utod nga Kevin kag Rey Villaruz.
Ginaalegar pa ni Semicula nga may yara sang dala nga hinganiban ang isa sa mga suspetsado.
Bangud diri, gilayon nga nagpangayo sang responde si Semicula sa mga kapulisan kag gilayon nga naaresto sanday Kevin kag Eric samtang nakapalagyo naman si Rey Villaruz.
