Isa ka korte sa Ireland ang nag-appoint sang isa ka manugbantay para sa isa ka mangunguma nga naghatag sang kalabanan sang iya kuwarta sa mga imol, pagkatapos nga ginsilingan siya sang Dios nga makadto siya sa langit kon himuon niya ini.
Suno sa mga report,nagbaligya siya sang iya propiedad sa balor nga €600,000 (katumbas sang mga P40 million). Sa sulod lamang sang pila ka semana, nakahatag na siya sang kapin sa katunga sini, ukon ginabanta nga €350,000 (mga P23.3 million).
Lakip sa iya mga ginhimo amo ang paghatag sang €1,000 cash sa isa ka babaye nga wala sang puluy-an. Bangod sang kadasigon sang pagkuha sang kuarta sa iya bank account, nabalaka ang Health Service Executive sang Ireland kag gindala ang kaso sa korte.
Ginhingyo nila ang pagbutang sang “guardian ad litem”, isa ka independente nga tawo nga gin-appoint sang korte agud amligan ang interes sang mangunguma gikan sa iya kaugalingon kag sa iya sobra nga paggasto sang kuwarta.
Ginsiling sang korte nga ang mangunguma nagapati nga ang paghatag sang tanan niya nga manggad amo lamang ang paagi nga makakadto siya sa langit. Bangod sang iya mga pahayag, nagpasugot ang korte nga mag-appoint sang guardian.
Samtang, ang korte nagmando nga ang identidad sang mangunguma indi pag-ipahibalo sa publiko. Ang kaso nagabukas sang isa ka paghinun-anon kon san-o ang pagkamaalwan mangin isa ka kabangdanan sang kabalaka para sa mental health sang isa ka tawo
