Arestado ang isa ka ginakabig nga High Value Individual ukon HVI sa ginpatigayon nga buy-bust operation sang kapulisan sa Barangay IX, Roxas City.
Ang subject person ginkilala sa kay alyas “Hermie,” 42 years old nga babaye residente sang Barangay San Jose, Roxas City, nadakpan sa operasyon matapos nga makumpiskar sa iya ang masobra ukon nagalab-ot sa 10 gramos sang suspected shabu nga may standard drug price nga kapin 68,000 pesos.
Sa Interview sang Bombo Radyo Roxas kay PLTCOL. Rogelio Tomagtang Jr., Chief of Police sang Roxas Component City Police Station, resulta ini sang padayon nga intelligence gathering, coordination kag collaboration sang kapulisan sa nagkalain-lain nga intelligence kag law enforcement units nga nagapadayon sang operasyon batok sa illegal nga droga sa syudad.
Dugang pa niya, may ginapatigayon nga collaboration meeting kaupod ang Capiz PDEA, kun sa diin ginapasa kag ginatalakay ang mga impormasyon nahanungod sa mga persona nga posible nga nagahimo sang illegal drug activities sa Roxas City.
Dugay na man suno sa kapulisan nga gina-monitor ang subject person, kag base sa ila record, sang nagligad pa nga tuig ginasuspetsahan na ini nga nagapakigbahin sa illegal drug activities.
Suno pa sa natungdan, gina-monitor ang subject person sa mga area sang Barangay San Jose kag Barangay IX sa Roxas City, kun sa diin ginasuspetsahan nga nagabaligya sang illegal nga droga.
Samtang, naghatag sang mensahe si Tomagtang sa mga persona nga nagapadayon sa pag-engage sa illegal nga droga nga padayon pa gid nga paigtingon sang kapulisan ang kampanya kontra sa illegal nga droga, kaupod ang mga nagkalain-lain nga mga law enforcement agency unit sa probinsya sang Capiz, kaupod ang Philippine Drug Enforcement Agency (PDEA), Provinvial Drug Enforcement Unit (PDEU) kag iban pa nga mga agency.
Apang suno sa iya, indi lamang operasyon ang ila ginapabaskog kundi pati ang information dissemination kag pakig-angut sa mga barangay officials, agud mabuligan ang mga barangay nga mangin drug-free kag sa ulihi, mangin drug-free man ang bilog nga Roxas City.
Nagpasalamat man si Tomagtang sa mga barangay officials kag pumuluyo nga nagahatag sang impormasyon sa kapulisan, kag ginpasalig nga pagapabilinon nga confidential ang mga impormasyon kag pagkilala sa mga nagahatag sini.
Sa subong, yara na sa kustodiya sang Roxas Component City Police Station ang subject person kun sa diin magapangatubang sang kaso nga paglapas sa RA 9165 ukon Comprehensive Dangerous Drugs Act of 2002, kag magapangatubang man ang subject person para sa drug testing kag confirmatory examination sa Crime Laboratory sang mga nakumpiskar nga suspected illegal drugs.
