Ginkumpirma ni Davao Oriental Governor Nelson Dayanghirang nga isa ka indibidwal ang napatay sa mabaskog nga linog nga nagluntad subong nga adlaw, Oktubre 10.
Suno sa Gobernador, ginpahayag nga taga Mati City ang ginreport nga biktima. Natumba ang bahin sang narumpag nga balay sa nasambit nga biktima.
Ginreport man sang lokal nga opisyal nga pila ka mga estraktura sa probinsya ang nagkalaguba. Padayon ang assessment sang mga otoridad sa sitwasyon sa ila lugar kasunod sang mabaskog nga linog.
Antes sini, gilayon nga nagpaguwa sang advisory ang Gobernador para sa pagkanselar sang klase sa eskwelahan kag trabaho kag temporaryo nga gindumilian ang mga pumuluyo nga magsulod sa pila ka mga pasilidad para sa ila seguridad.
Sa mga laragway nga ginpaambit sang Gobernador sa iya social media account, makita ang pila ka mga insidente sang pagkatiphag sang duta kag pagkatumba sang kahoy kag mga kable kag poste sang kuryente sa mga dalanon, partikular sa Manay nga sentro sang linog.
Natabo ang linog las 9:44 subong nga aga. Santo sa data nga ginpagwa sang PHIVOLCS, may kadalumon ini nga 10 kms.
Ginpanugyanan man sang PHIVOLCS ang mga naga-istar sa coastal areas sa Eastern Samar, Southern Leyte, Leyte, Dinagat Islands, Surigao del Norte, Surigao del Sur, kag Davao Oriental nga mag-evacuate sa mas mataas nga lugar kasunod sang linog.
