Patay ang isa ka indibidwal sa Davao City, samtang kapin naman sa 127,000 ka mga indibidwal ukon katumbas sang 27,000 ka mga pamilya ang apektado sa nagkalain-lain nga bahin sang pungsod bangud sang gintingob nga epekto sang Habagat kag Bagyo Kiyapo.
Suno sa Office of Civil Defense (OCD), gin-anod sang nagadaludo nga tubig ang biktima kag ang iya motorsiklo sa Barangay Talandang, Davao City.
Kapin sa 300 ka pamilya ang apektado man sa tatlo ka barangay, samtang 1,999 naman ang temporaryo nga nagatiner sa 55 ka mga evacuation centers.
Samtang 115 naman ka mga balay ang nahalitan kun sa diin 88 diri ang lubos nga naguba.
Padayon ang pagpatigayon sang search, rescue, kag retrieval operations sang mga otoridad, samtang handa naman ang relief goods kag standby funds para sa mga apektado nga pumuluyo.
Nagpanugyan naman ang OCD sa publiko, ilabi na ang mga nagapuyo sa mga lugar nga may landslide kag baha, nga magpabilin nga alerto kag magpamati sa mga advisories sang lokal nga gobyerno samtang nagapadayon ang malain nga panahon.
