Ka-bombo kon kaisa bala nagapati kaman nga basi isa ka adlaw, mabugtaw ka na lang nga may bag-o ka nga roommate?
Ginapaminsar mo man nga “normal” lang man ina, apang, paano kun kasubong ka sang scenario sa isa ka lalaki sa Altadena ang may indi gina-ekspektar nga bisita sa iya balay kag indi ini tawo, kundi isa ka daku nga itom nga oso nga daw kaangay nagdesisyon nga “rent-free” anay sa crawl space sa idalom sang balay.
Suno kay Ken Johnson, 63 anyos, ginpahayag niya nga nagbutang siya sang security camera matapos niya makita nga may ginpanguba nga parte sang iya balay.
Abi niya anay ido ini ukon raccoon lang.
Apang sang nag-check siya sang footage sang nagligad nga semana, may surprise guest siya nga nakita, isa ka higante nga oso nga nagaguwa halin sa idalom sang balay pareho sang tag-iya sang lugar.
Suno kay Johnson, ang oso halos kapareho kataas sang lamesa kag daw wala gid plano maghalin.
Ang oso posible nga halin sa Angeles National Forest matapos ang nagluntad nga forest fire sa bahin sang kakahuyan kag natural nga puluy-an sang mga sapat.
Pero sa baylo nga magkadto sa hotel, direkta gid siya sa balay ni Johnson nag-check in.
Subong, nagapangita si Johnson sang paagi paano mapahalin ang iya “roommate” antes pa ini magsugod pangayo sang Wi-Fi password kag mag-order sa food delivery apps.
