ROXAS CITY – Halos indi makapati ang mga staff sang isa ka kalan-an matapos nga ginaalegar may isa ka wala matumod nga persona nga nagpakilala nga si Vice Mayor Erwin Sicad sa diin ginpangayuan sang load kag nag-order pa sa ila sang pagkaon sa Barangay Baybay, Roxas City.
Sa interview sang Bombo Radyo Roxas kay Peejay Bechayda nga nagtawag sa ila ang wala matumod nga persona kag nagpakilala nga vice mayor sang siyudad kun sa diin nag-order ini sa ila sang pagkaon nga para sa 18 ka mga tawo.
Nahibaluan nga naglab-ot sa P16,200 ang mga pagkaon nga gin-order sang nasambit nga suspek sa amo nga kalan-an.
Magluwas diri, naghinyo pa ini sang load sa amo nga restaurant sang P1,000 rason nga ginsugo na lamang sang ila manager ang waiter nga si Renan Vasquez nga magkadto sa mall subongman magbakal sang wine.
Nahibaluan nga samtang yara sa isa ka daku nga mall ang waiter hinali na lamang nga nagtawag ang suspek kag nagpadugang pa sang P6,000 nga regular load.
Apang, ginpahayag sang waiter nga kulang ang kwarta sini nga ginpadala sa iya sang ila manager.
Bangud diri, naghinyo liwat ang suspek sa waiter nga siya na lang maistorya sa amo nga loader.
Apang, wala naman ginalaoman sang amo nga waiter nga naglab-ot na sa P16,500 ang ginload sang loader sa amo nga suspek.
Apang, diri na sila nagduda kun sa diin ulihi na natukiban nga indi si Vice Mayor Sicad ang nagtawag sa ila sa baylo modus ini sang wala matumod nga suspek.
Bangud diri, ginpakamaayo na lamang sang nasambit nga staff nga iparekord sa pulisya ang insidente.
Nagapadayon naman ang imbestigasyon sang mga otoridad agud matumod ang amo nga suspek.
