Arestado ang isa ka lalaki matapos makuhaan suspected shabu kag armas nga may bala sa Barangay Sto. Niño, Dumalag, Capiz.
Ang arestado amo si alyas nga “Den,” residente sang Barangay Nagba, Cuartero, Capiz.
Sa interview sang Bombo Radyo kay Police Major Amie F. Bulaquiña, Officer in Charge sang Dumalag Municipal Police Station, iya ginpahayag nga nakabaton sila sang report tuhoy sa isa ka lalaki nga ginaalegar nga armado sang armas sa nasambit nga barangay.
Bangud dire, gilayon nga nagresponder ang mga operatiba kag naaresto si alyas den.
Suno kay Bulaquiña, sang ginrikisa ang suspetsado na-recover sa paghinakop sini ang 38 caliber revolver kag tatlo ka bala nga wala sang mga nagakaigo nga dokumento.
Sa subong yara na ini sa kustodiya sang Dumalag MPS kag magapatubang sa kaso nga paglapas sa Republic Act No. 10591 ukon Comprehensive Firearms and Ammunition Regulation Act kag Republic Act No. 9165 ukon Comprehensive Dangerous Drugs Act of 2002.
