ROXAS CITY – Nagpabalhag sa Roxas City Police Station ang isa ka engineer matapos nga ginaalegar ginareklamo ang iligal nga paghupot sang armas luthang sang isa ka media practitioner sa Barangay Tiza, Roxas City.
Sandig sa ginpabalhag sa pulisya ni Boy Fernandez sang nasambit nga lugar ginareklamo sini ang iligal nga paghupot sang armas luthang ni Roberto April Gonzales alias Wepol kun sa diin gilayon naman nga nagresponde ang mga kapulisan.
Magluwas diri, nagpablotter man si Marlon Chua 26-anyos sang amo man nga lugar sa diin ginaalegar nga gindul-ong sang wala matumod nga lalaki sakay sa AEROX nga motorsiklo si Wepol kag gilayon ini nga nagpalupok sang armas luthang sa amo nga lugar.
Samtang, hugot naman nga ginpanginwala ni Wepol ang alegasyon nga ginahaboy batuk sa iya sang mga tagreklamo.
Base sa inisyal nga imbestigasyon sang Roxas City Police Station ginaalegar nga nag iskandalo pa ang amo nga suspek nga yara sa idalom sang impluwensya sang makahulubog nga ilimnon samtang ginaaresto sang mga kapulisan.
Narekober naman sa lugar nga ginluntaran sang insidente ang lima ka basiyo sang .45 caliber nga armas luthang.
Natalana naman nga pasakaan sang nagakaigo nga panumbungon ang amo nga suspek subongman ang iya nga amay nga si Roberto Gonzales bangud man sa iya pagpangapin sa anak.
Sa karon, nakahunong na sa karsel sang Roxas City Police Station ang mga suspek.
