ROXAS CITY – Ginpadulungan sang mga katapo sang City Disaster Risk Reduction and Management Council kaupod ang iban pa nga mga opisyales sang gobyerno sang siyudad ang isa ka 52 ginang nga gikan sa Metro Manila agud hinyuon ini nga mag-self quarantine.
Mahibaluan nga ang nasambit nga ginang ang isa ka negosyante kag nagabaligya sang utan sa Teodoro Arcenas Trade Center (TATC) nga nag-abot sa Capiz sadtong Marso 9 antes pa man ang community quarantine sa Metro Manila.
Suno sa ginang, wala man sang problema sa iya kun ipaidalom siya sa self-quarantine kag ginalauman naman sini nga padulungan siya sang mga opisyales sang ila barangay.
Ginpahayag sini nga ginapaubos lamang sini ang ila pamaligyaon sa TATC bangud nanugon man ini nga magkaladunot ang iya ginabaligya nga mga produkto.
Nagalain naman ang buot sang ginang sa suno diri indi maayo nga pagtratar sa iya.
Ginpahayag sini nga wala man sang problema sa iya kun ano ang panugyan sang mga otoridad sa baylo ipaagi lamang sa maayo nga pagpakig-estorya.
Suno naman kay CDRRM Officer Dennis Saneo, ila ginpapirma sa health declaration ang nasambit nga ginang.
Ginpanugyanan man ini nga indi anay magguwa kag gin-edukar man sa mga dapat sini nga himuon samtang siya ang nagapaidalom sa health quarantine.
