ROXAS CITY – Nagpositibo sa Coronavirus Disease ukon COVID-19 ang isa ka 64-anyos nga lalaki nga residente sang Barangay Baybay sining siyudad kag nagatrabaho sa Libas Fishing Port sa Barangay Libas, Roxas City.
Ini ang gin-anunsyo ni City Mayor Ronnie Dadivas sa iya nga official statement pinaagi sa iya facebook post.
Suno kay Dadivas nga sadtong August 12, nakabatyag sang hilanat rason nga nagpaidalom ini sa home quarantine.
Samtang, Agosto 15 naman sang nagsaylo ini sa facility quarantine kag nagpaidalum sa swab testing.
Sa karon, nagapabilin ini nga naka-admit sa Roxas Memorial Provincial Hospital ukon RMPH.
Bangud sa natabo nadesisyonan ni City Mayor Ronnie Dadivas nga ipatuman ang mga masunod:
Una, guilayon nga pagpasarado sang opisina sa Libas Fishing Port.
Ikaduha, pagdumili sa mga fishing boats nga magpalawod sa sulod sang apat (4) ka adlaw.
Ikatatlo, ang mga yara na sa lawod subong pagatugutan pa nga magdungka kag mag-ariya sang ila mga isda sa masunod nga duha ka adlaw apang kinahanglan magsunod ang tanan sa istrikto nga physical distancing. Amon iga-kordon ang lugar nga patigayunan sang auction.
Ang Roxas City PNP, Maritime Police, Coast Guard kag Bantay Dagat ang magapatuman sang aton mga ginbutang nga polisiya kag direktiba.
Ginpahayag naman sang alkalde nga padayon ang contact tracing sa mga naka-close contact sa nagpositibo.
Nagaapelar naman si Dadivas nga ilakip sa pangamuyo nga maluwas sa peligro ang kabuhi sang tanan nga mga pumuluyo subongman ang mga Frontliners nga padayon nga nagapakigbato subong nga COVID-19 Pandemic.
