ROXAS CITY – Posible nga magkinagamo sa isa ka estado sa Nigeria kasunod sa pagdeklara sang total lockdown sang gobernador sang River State, matapos nagtaas ang numero sang mga naapektuhan sang COVOD-19 sa pungsod.
Sa report ni Bombo International Correspondent Edwin Pancho Fario Jr., sang Guimaras, Iloilo kag nagatrabaho sa isa ka construction site sa River State, Nigeria, ginpahayag sini nga indi malikawan nga makaangkon sang riot ukon kinagamo kun magdugay sang isa ka semana ang lockdown, bangud wala sang makuhaan sang pagkaon ang mga tawo matapos madulaan sang trabaho.
Suno kay Fario nga indi pareho sa Pilipinas nga may ginahatag nga bulig ang gobyerno sa mga tao kun magdeklara sang lockdown.
Sa Nigeria wala sang nabaton nga subsidiya ang mga tawo gikan sa gobyerno, gani sigurado nga magutuman ang kadam-an nga mga local residents.
Wala man nagapati ang mga Nigerians sa coronavirus disease, bangud para sa ila nga isa lamang ini ka political tactic sang mga pulitiko bilang panugod sang korupsyon.
Ginpasiguro man ni Fario nga safe and sound sila nga mga trabahador sa sulod sang construction site sa diin well provided sila sa pagkaon kag tubig sang kompaniya.
Magluwas diri, may clinic man sa sulod sang site sa diin mahimo sila nga magpa-check-up.
Indi man sila basta makaguwa sa site, sa diin kinahanglan ang escort nga pulis bangud prone sa kidnapping ang mga foreign workers sa nasambit nga pungsod.
Samtang nahibaluan nga nag-order sang rapid testing kit sa Korea ang management sang kompaniya para matsekyar kun may nalatnan sang coronavirus disease nga mga trabahador.
Sa karon nagalab-ot sa 3,000 ang kaso sang COVID-19 sa River State sa diin 21 ang nagpositibo sa nasambit nga sakit, 17 ang ginpaidalum sa quarantine kag 2 ang patay.
Nahibaluan nga ang River State ang isa sa 36 nga estado sang Nigeria nga ginakabig nga sixth-most populous state sa pungsod Nigeria.
