Personal nga nagpadulong sa talatapan sang Bombo Radyo Roxas si tatay Romeo, 62-anyos, isa ka senior citizen, residente sang Barangay Quios, banwa sang Panitan nga kun sa diin ginareklamo sini kun ngaman wala ini sya nakalakip sa listahan sang payroll sa pagahatagan sang ayuda para sa mga senior citizen sa palaabuton nga Lunes, Agosto 19 sa nasambit nga lugar.
Pahayag ni tatay Romeo, dugay na ini sya nakapasa sang iya requirements para malakip sa listahan sang mga senior citizen sa amo nga barangay.
Duha na ini ka beses nga wala nadala sa listahan sang mga benepisyaryo sa amo nga ayuda. Apang, suno diri ang bag-o lang nag-edad 60, nauna pa nga nakasulod sa iya.
Natingala suno diri si tatay Romeo kun ngaman nauna pa ang mga bag-o lang nakapasa sang requirements ang nalakip sa listahan apang ginhalaan ini nga sa masunod pa ini nga release makakuha.
Luyag ni tatay Romeo mahibaluan ang rason kun ngaman tubtob sa karon wala pa ini sa gihapon nalakip sa listahan sa duha na sini ka tuig nga paghulat nga malakip para mangin benepisyaryo sang nasambit nga ayuda.
Dugang pa sini, nagsalig ini nga malakip sa amo nga ayuda agud may ibakal kuntani sang iya nga maintenance.
