Daku ang nabatyagan nga kadungganan sang isa ka student leader nga mangin finalist sang Outstanding student leader of the philippines 2026.
Sa interview sang Bombo RAdyo kay Jay P Basa, iya ginpahayag nga ang ini nga nominasyon ang isa ka daku nga oportunidad agud mas mapasangkad kag mapabati ang tingog sang kabataan sa nagkalain-lain nga isyu kag inisyatibo nga nagaapekto sa ila.
Suno kay Basa, indi lamang ini personal nga kadalag-an kundi pagkilala man sa mga proyekto, programa kag mga adbokasiya nga iya ginpangunahan sini bilang isa ka student leader.
Pahayag pa niya, nagahatag man ini sang dugang nga inspirasyon kag responsibilidad sa iya agud padayon nga mangin ehemplo sa kapareho niya nga mga kabataan kag magserbisyo sa komunidad pinaagi sa mga makahulugan nga programa.
Nagpasalamat man siya sa suporta sang iya pamilya, mga kaeskwela, mga mentor kag organisasyon nga nagbulig sa iya bilang lider.
