ROXAS CITY – Nagparekord sa Roxas City Police Station ang isa ka traffic auxiliary matapos ginaalegar ginpahog sang isa ka babaye nga sakay sang salakyan nga iya ginsita bangud sa ilegal parking sa Burgos Talipapa, Burgos Street, Roxas City.
Ang tagreklamo amo si Jonie Alabot, 41 anyos sang Barangay Inzo Arnaldo Village, sining siyudad.
Base sa ginpabalhag ni Alabot, nagtuyo kuntani nga magpark sang iya nga salakyan si Mildred Galagate sa nawala nga porsyon sang karsada sa amo nga lugar apang iya ini nga ginsita bangud bawal ini.
Nagpanugyan pa ini kay Galagate nga mag-park na lamang sa natuo nga porsyon sang karsada apang sa baylo nga magpati, ginmulay pa siya sang babaye kag kasubong gina-kwestiyon pa kun nahibaluan sini ang iya nga trabaho.
Nagtuyo pa si Alabot nga magpakig-estorya sa babaye apang ginasinggitan lamang siya sini.
Bangud diri, gindala ang duha sa talatapan sang pulisya kag ginpakamaayo na lamang ni Alabot nga iparekord ang natabo.
