Nagapati ang Ilonggo human rights lawyer nga si Atty. Gilbert Andres nga isa tikang padulong sa hustisya ang isa ka tuig na ang nagligad sang pag-aresto kag pagdala kay Rodrigo Duterte sa International Criminal Court sa The Hague, Netherlands.
Matandaan nga sang Marso 11, 2025 pag-abot ni Duterte sa Pilipinas halin sa Hong Kong sang siya ang ginserbehan sang warrant halin sa International Criminal Court bangud sa ginaalegar extrajudicial killings sa iya nga drug war campaign.
Sa interview sang Bombo Radyo kay Atty. Andres, iya ginpahayag nga madamo pa nga mga tikang ang kinahanglanon nga ma-agyan antes makuha ang hustisya paagi sa proseso sang International Criminal Court.
Suno kay Atty. Andres, isa sa mga ginatubang nga challenge sang mga biktima amo ang paglapta sang dis-information kag ang isyu sa seguridad ukon physical security sang mga biktima sang war on drugs.
Sa subong, nagapangatubang ang former president sang tatlo ka counts sang crimes against humanity sa iya kampanya kontra iligal nga droga.
Nahibaluan nga nagtapos na sang nagligad nga bulan ang pre-trial hearings sang ICC Pre-Trial chamber I kag ginahulat na lang ang desisyon kun madiresto ukon indi sa trial ang mga kaso ni Former Pre. Duterte.
