ROXAS CITY -Nagpasalig ang tagpamaba sang 3rd Infantry Division – Philippine Army nga mas establisyar kag kontrolado sa karon sang mga katapo sang militar ang pagpabilin sang seguridad sa mga pumuluyo matapos ang nagluntad nga engkwentro sa tunga sang 12th Infantry Battalion – Philippine Army kag New People’s Army (NPA) sa Barangay Nayawan, Tapaz, Capiz.
Sa interview sang Bombo Radyo Roxas kay Major Cenon Pancito III nga magapatigayon kun tani sang aktibidad ang mga katapo sang militar sa nasambit nga barangay sang hinali nga nagkitaay ang banas nila kag sang mga rebelde nga grupo.
Suno kay Pancito nga pilason nga ginpadangat sa ospital ang isa ka Private First Class nga miyembro sang militar matapos nakaangkon sang luthang sa tiyan kag paa.
Mahibaluan nga ginabulubanta 130 metros ang kalayuon sang duha ka grupo sa isa kag isa.
Gindugang pa ni Pancito nga naglawig sang 15 minutos ang pagbayluhanay sang lupok sang armas luthang sang nasambit nga magtimbang nga bahin.
Gindugang man ni Pancito nga nagapadayon man sa karon ang masangkaron nga pagpatigayon sang Community Support Program (CSP) sang mga militar sa magkatuhay nga mga kabaranggayan sa banwa sang Tapaz.
