ROXAS CITY – Nabutang karon sa kontrobersiya ang isa ka investment scheme matapos ginasiling nga wala mabalik sa mga investors ang ila gin-invest nga kuwarta.
Sa pagpangusisa sang Bombo Radyo duha ka babaye nga ginatawag ‘’Madam’’ ang yara sa likod sang 25 Days Double your money investment scheme sa Barangay Tiza, sining syudad.
Kilala nga negosyante sa Roxas City ang isa ka babaye samtang ang isa naman ang taga banwa sang Sapian.
Ba-se sa impormasyon nga tunga tunga sang bulan sang Nobyembre sang nagligad nga tuig sang gintukod ang nasambit nga investment scheme kag agud makaganyat sang madamo nga investors nagpatigayon pa sila sang promo nga 15 days double your money.
Nangin maayo ang dalagan sang operasyon sini sang Nobyembre kag Disyembre sa diin madamo pa sa mga investors ang naka-pay-out.
Nag-angkon lamang sang problema sini nga bulan sang Enero sang iban nga mga investors ang wala na nakabaton sang ila pay-out.
Agud masabat ang reklamo kag palamangkutanon sang mga investors, nagkuha sang isa ka abogado nga konektado sa kapitolyo probinsiyal ang nagapalakat sa nasambit nga investment scheme.
Nagpasalig ang abugado sa mga nagapamangkot nga investors nga indi magpalagyo sanday Madam sa diin ang solusyon sa karon nga ibalik ang kapital sang mga investors.
Samtang nagguwa ang report nga madamo nga mga pulis ang investors kag personal nga nagapadulong sa Barangay Tiza agud sukton ang ila gin-invest nga kuwarta.
