Isa naman ka manunudlo ang ginluthang-patay sang iya bana sa sulod sang isa ka eskwelahan sa Agbanga Elementary School sa Matalom, Leyte.
Napatay ang 39-anyos nga biktima nga isa ka manunudlo sa kindergarten. Napatay man ang 49-anyos nga suspek nga ginasuspetsahan nga nagtiro sa iya kaugalingon sa ila puluy-an matapos makomiter ang krimen.
Suno sa pulis, wala sang security guard sa eskwelahan, kag nagpakuno-kuno ang suspek nga delivery rider agud makasulod sa eskwelahan.
Base sa panaysayon sang pila ka mga manunudlo, nagbaisay ang mag-asawa, tubtub nga nagdalagan ang biktima pasulod sa isa ka classroom sa diin ginsundan ini sang suspek kag ginluthang sang makaduha ka beses.
Antes ang krimen, nahibaluan nga nagpa-blotter ang biktima batuk sa iya bana bangud sa paglapas sa violence against women and children (VAWC) law.
Suno sa kapulisan, nasapwan ang bangkay sang suspek sa sulod sang banyo sang ila balay kag may nakita man nga pusil sa tupad sini.
Naigo sang bala sa liog ang biktima nga gintunaan sang iya kamatayon.
