ROXAS CITY – Patay ang isa ka indibidwal samtang pilason naman ang isa matapos ang nagluntad nga insidente sa Highway sang Barangay Cagay, Roxas City takna ala 1:45 kaina sang kaaganhon.
Ginkilala ang drayber sang RACAL 150 nagaduag asul kay Kiven Roice Villaruz 22-anyos residente sang Barangay Sibaguan, Roxas City samtang ang drayber naman sang Kawasaki CT100 nagaduag itom ang ginkilala kay Marlon Balas 49-anyos barbero kag residente sang Barangay Cudian, Ivisan Capiz.
Sa impormasyon nagikan sa Roxas City PNP, ginpahayag nga takna ala 1:37 sang aga samtang ginasubay ni Villaruz ang dalan nagikan sa Barangay Sibaguan kag padulong kun tani sa Roxas City proper sang aksidente sini nga bumunggo sa motorsiklo nga kasugata nga ginamaneho ni Balas kag ginpahayag nga nagikan sa Roxas City proper kag padulong man kun tani Ivisan sang nagluntad ang insidente.
Bangud sa impak, lunsay nga natumba ang duha kag nag-angkon sang patal nga pilas sa ulo, natuo nga paa kag magkatuhay nga parte sang lawas si Balas kag madasig naman nga ginrespondihan sang Capiz Emergency Response Team (CERT) agud dapatan sang pauna nga pagbulong antes gindala sa Roxas Memorial Provincial Hospital (RMPH) apang gindeklarar ini nga dead on arrival sang doctor.
Samtang, nag-angkon naman sang patal nga pilas sa ulo kag tiil si Villaruz nga madasig naman ginrespondihan sang Roxas City Emergency Response Team (RCERT), agud dapatan sang pagbulong antes ginpadangat sa isa ka pribado nga ospital sa syudad sang Roxas.
Sa karun, yara na sa paghinakop sang Roxas City PNP ang mga imbulbado nga motorsiklo para sa nagakaigo nga disposisyon.
