Isa ang patay samtang lima naman ang pilason matapos nadulaan sang preno ang isa ka tanker truck, nag-arado sa tatlo ka mga salakyan, kag naglupok sa Maharlika Highway sa Atimonan, Quezon.
Suno sa kapulisan, nagabiyahe padulong ang tanker truck sang nadulaan sang preno kag nabungguan ang stationary trailer truck nga una na nadisgrasya.
Bangud sa kabaskugon sang pagkabunggo, nagbaliskad ang tanker kag naglusot sa karsada rason nga nabungguan ang duha ka tricycle sa unahan.
Patay ang driver sang tanker samtang nag-angkon sang third-degree burn ang tatlo ka mga estudyante kag duha ka tricycle drivers.
Nasunog ang mga traysikol, isa ka balay, isa ka sari-sari store, mga kahoy, kable sang kuryente, kag mga motorsiklo.
Nagtuga man ini sang daku nga kahadlok sa mga pumuluyo.
Gindala sa ospital sang Atimonan ang mga pilason, apang ginsaylo ang tatlo ka mga estudyante sa East Medical Center sa Quezon City bangud sa kabug-at sang ila mga paso.
Suno sa mga tricycle driver, nagdalagan sila sang mga estudyante pasaka sa bukid matapos nga nasunog ang salakyan.
Nagpanawagan naman ang amay sang isa sa mga biktima sang sa tag-iya sang tanker.
Pahayag sang kapulisan, ini na ang ikatlo nga insidente sang brake failure sa lugar sa sulod sang tatlo ka bulan. Ginpahanumdom man nila ang mga motorista nga maghalong kag maghinay kun maglabay sa amo nga bahin sang dalan
