DUMARAO, CAPIZ – Patay ang isa ka pahinante matapos bumunggo ang ila ginasakyan nga truck sa kaangay man nga truck sa Barangay Aglalana, Dumarao, Capiz.
Ang wala na ginhingadlan nga biktima isa ka lalaki kag nagapang-edaron sang 54-anyos nga residente sang Roxas City.
Sa interview sang Bombo Radyo kay Dumarao PNP Information Officer PLT. Irene Toos, ala 1:30 sang kaaganhon, Nobyembre 12, 2024 natabo ang aksidente kun sa diin lunsay nagikan sa Iloilo ang duha ka truck sang hinali lang bumunggo ang Mitsubushi Canter truck nga may karga nga dressed chicken sa naka-hazzard nga kaangay man nga Mitsubishi Canter truck nga may karga naman nga frozen foods.
Suno pa kay Toos nga naka-hazzard ang truck nga may karga nga frozen foods bangud may ginbuligan ini nga isa ka salakyan nga naaberya sa dalan.
Bangud sa mabaskog nga impact sang pagkabunggo, naipit ang pahinante nga gintinguhaan pa nga dal-on sa Dao District Hospital para sa nagakaigo nga pagbulong apang sa ulihi ginbawian man sang kabuhi.
Samtang, yara naman sa istabli nga kondisyon ang kaupod sini nga driver nga nag-angkon sang samad sa tiil tuga sang nasambit nga aksidente.
Nag-settle naman ang magtimbang nga bahin kag indi na magpasaka sang kaso ang pamilya sang napatay kag pagabayaran nalang sang tag-iya sang salakyan ang tanan nga gastos.
