ROXAS CITY – Tuman sa karon ang paghinulsol sang isa sa kapin 261 ka mga biktima sang illegal recruitment matapos matuntuhan ni Ramilyn Andrade sang Barangay Bolo, Roxas City kag live-in partner sini nga isa ka Korean national nga si Kim Tae Hyeong.
Suno kay Doroteo Laforteza, wala ini nagdahum-dahom nga tuntuhon sila sang ila kaugalingon nga kasimanwa bangud tuman na ka dako nga kantidad sang kwarta ang ila nabayad diri.
Ginpahayag pa sini nga nag-eskwela pa siya sang Korean language bangud nagalaom ini nga makaplastar sila sang trabaho sa Busan, South Korea bilang factory worker nga amo ang ginpasalig ni Andrade.
Suno diri, una sila nga ginhambalan ni Andrade nga sadtong Oktubre 20 ang ila flight padulong sa Korea apang wala ini nadayon.
Ginre-schedule ini sadtong Nobyembre 10, apang sa liwat wala naman ini nadayon.
Kag sadtong Nobyembre 12, kun sa diin may mga maleta na nga dala ang mga biktima, ginhambalan sila ni Andrade nga sa liwat, cancelled naman ang ila flight.
Diri na nagduda ang mga biktima kag gin-usisa ang ila ticket kun sa dii nila natukiban nga peke gali ini kag ginmatu-mato lamang sang print ni Andrade.
Ginhambalan pa sila ni Andrade nga sa Kalibo ang ila nga flight padulong sa Korea apang sang ila gintawagan ang Korean airlines, didto nakompirmar nga wala sila sang flight sa Kalibo.
Sa karon ang luyag lamang matabo ni Laforteza amo ang mabalik ang ila kwarta nga ginbayad kay Andrade para sa placement fee, pocket money, visa kag terminal fee.
Samtang ginkompirmar naman ni Capiz governor Esteban Evan Contreras nga nagpakigsapol na sa iya si Andrade.
Suno kay Contreras, nagahilibion nga ginhambal ni Andrade nga wala sa iya ang kwarta sang mga biktima bangud yara ini sa account sang koreano nga si Kim.
Ginapahayag nga yara sa karon sa Korea si Kim kag suno kay Andrade, nakahanda man ang live-in partner sini nga ibalik ang kwarta sang mga biktima.
Apang direkta naman nga ginhambal sang gobernador kay Andrade nga kun indi sini mabalik ang kwarta sang mga biktima, mismo ang gobyerno-probinsiyal ang pagahimo sang paagi agud mapasakaan ini sang nagakaigo nga kaso.
Nahibaluan dugang nga nakilala ni Andrade si Kim pinaagi sa iya isa ka abyan nga nakapangasawa sang isa ka Korean national.
