Tuman ang pagpasalamat sang isa sa mga cast sang Pasyon ni Kristo 2026 bangud nangin kabahin ini sang nasambit nga kahiwatan.
Sa interview sang Bombo Radyo kay Danilo Ditillero, production staff kag isa sa mga cast sang Pasyon ni Kristo, iya ginpahayag nga sa paagi sa pag-portray sang mga karakter sang amo nga pasyon, mabatyagan sini nga nangin kabahin siya sang kabuhi ni Hesus sang yara ini sa duta agud tuboson ang sala sang katawhan.
Suno kay Ditillero, makabig sini ang iya nga kaugalingon nga pioneer sang amo nga kahiwatan bangud nangin kabahin siya sang 51 ka tuig nga pagpatigayon sang paghanduraw sang Pasyon ni Kristo.
Nagalaum man ang natungdan nga magapadayon ang tuigan nga debosyon sang banwa sang President Roxas agud padayon man nga mapalapnag sa bag-o nga henerasyon ang mga kabuhi kag kasakit ni Hesus.
