ROXAS CITY – “Child Protection through Child Participation” ini ang nangin adbokasiya sang isa ka estudyante nga ginpasidunggan sang Borres Youth Leadership Institute (BYLI) bilang isa sa mga awardees sang 8th Batang Capiznon Awards Search for the Ten Outstanding Student of Capiz (TOSOC).
Sa programa nga Good Morning Philippines, ginpahayag ni Jophet Cam nga halos indi ini makapati sa nabaton nga kadalag-an kun sa diin daku ini nga bulig para sa iya nga pagtuon kag pag-engganyo man sa mga kabataan nga indi madulaan sang gana sa pag-eskwela.
Suno kay Cam nga antes niya nalab-ot ini nga kadalag-an madamo pa sang mga pagtilaw sa iya kabuhi partikular na sa iya pagtimakas kag pagtuon apang wala gid ini nadulaan sang paglaom.
Mahibaluan nga nagabakas gid siya sa pag-eskwela agud sa ulihi makabulig man ini sa iya nga pamilya.
Samtang, nagpasalamat naman si Cam sa mga tawo nga nagserbi nga inspirasyon para makuha ang nasambit nga pasidungog kun sa diin nagapanguna nga supporter niya ang iya nga pamilya.
Nagalaom naman si Cam nga madamo pa sang mga kabataan nga pareho sa iya ang mabuligan niya sa ulihi pinaagi sa iya ginaduso nga adbokasiya.
Samtang, nagpanugyan naman ini sa mga kabataan kag estudyante nga mag-eskwela sang ensakto agud nga malab-ot ang tagsa ka mga handum sa kabuhi.