ROXAS CITY – Ginpasidunggan bilang isa sa mga regional winners sang 2020 Search for Outstanding Government Workers Civil Service Commission ukon CSC Regional Pagasa Award sa idalom sang Honor Award Program (HAP) si Senior Jail Officer II Ernie A. Olendo.
Sa programa nga Good Morning Philippine Program ginpahayag ni SJO2 Olendo nga daku ini nga kadalag-an para sa iya subongman sa Roxas City Jail, Bureau of Jail Management and Penology (BJMP).
Suno kay Olendo nga nagsulod ini sa serbisyo bilang civil servant kag pila naman katuig nga nagapanerbisyo bilang katapo sang BJMP.
Wala man sini gina-ekspektar ang amo nga pasidungog apang nagapati siya nga may yara gid sang kadalag-an basta ginahimo sang ensakto kag ginapalangga ang trabaho.
Ginpahayag sini nga padayon sa gihapon ang programa nga ginapatigayon sang Roxas City Jail partikular na sa Livelihood program agud nga mas mapanami pagid ang serbisyo kag pasilidad para sa mga Persons Deprived of Liberty.
Dugang pa sini nga apisar nga nagapangatubang ang pungsod sa Coronavirus Disease ukon COVID-19 Pandemic natigayon sa gihapon nga mabaligya ang mga produkto sang PDL’s pinaagi sa online selling.
Magluwas diri, makita man ang mga ginabaligya nga produkto sang mga PDL’s nga sarang mabakal sa Paseo de Cathedral, Roxas City.
Subongman nagahatag gid ini sang oras sa pagtsekyar sa social media sang mga nagkalain-lain nga produkto nga sarang naman mahimo nga maggamit sang mga PDL’s.
Ang mga pondo ukon pila ka mga kagamitan naman nga sarang maggamit sang mga PDL’s sa paghimo sang mga produkto ang nagikan sa nagkalain-lain nga mga LGU’s kag ahensya sang gobyerno.
Nagapasamat naman ini sa mga tawo nga yara sa likod sang nasambit nga pasidungog kag nagsuporta partikular na kay City Warden Chief Inspector Felix Sariana, Stakeholders and Service Providers, PDL’s kag madamo nga iban pa.
Mahibaluan nga ang Pasidungog 2020 ang tuigan na nga ginapatigayon kun sa diin sang damlag lang ginhiwat ang ika-120 years anniversary sa Iloilo Esplanade, The Grove, Tabucan, Manduriao, Iloilo City sadtong Setyembre 24, 2020.
