(UPDATE) – Ginpahayag sang Punong Barangay sang Brgy. Agustin Navarra, sa banwa sang Ivisan, nga wala sang rekord sa ila barangay ang isa sa ginatudlo suspek sa pagluthang sang lalaki nga nagamaneho sang van, sa Barangay Poblacion Sur, sa nasambit nga banwa.
Matandaan nga ang mga suspek amu sanday Reygan Tolentino, 37-anyos kag Mon Villarisco, 33-anyos lunsay mga residente sang amu nga lugar.
Sa interview sang Bombo Radyo kay Brgy. Kapitan Danny Loberes, ginsiling sini nga mabuot nga klase sang tawo si Villarisco, samtang si Tolentino ang naulamid sadto sa pag-ilinaway apang natigayon nga mahusay sa ila barangay.
Suno pa sa Kapitan, nga matapos nagkoordinar sa iya ang kapulisan sa Ivisan, ginpatawag niya si Villarisco kag diri ginpanginwala sang supek ang pagpangluthang, bangud suno diri, nakapanaog na ini sa ginsakyan nga Honda click nga ginamaneho ni Tolentino, sang natabo ang insidente.
Sa dugang nga pagpanalawsaw ni Kapitan Loberes, nabatian sini nga diyutayan masangit sang van ang motorsiklo nga ginasakyan sang duha ka suspek.
Matandaan nga ba-se sa inisyal nga imbestigasyon sang Ivisan MPS, alas-7:45 sa gab-i sang Agosto 27, ginamaneho ni Karl Edgar Borbe ang van nagikan sa Altavas, Aklan, apang pag-abot sini sa banwa, hinali ini ginluthang sang mga sakay sang motorsiklo, gamit ang ginapatihan cal .45 nga armas-luthang.
Nag-angkon sang daplis sa abaga ang driver sang van, samtang wala man naigu ang iban sini nga kaupod sa van.
Makaligad ang pila ka oras, nadakpan ang mga suspek kag ginkustodiya sa Ivisan MPS.
Sa karon, ginatugyan sang Punong Barangay ang imbestigasyon sa mga katapo sang kapulisan.
