ROXAS CITY – Nagdepensa naman ang tag-iya sang ginareklamo nga babuyan sa Barangay Bolo, Roxas City.
Ini matapos nga ginpalab-ot sang pila ka mga residente sa nasambit nga barangay sa Bombo Radyo ang nasambit nga reklamo.
Suno kay Alona Blancaver isa sa mga tag-iya sang babuyan nga tatlo sila ang nagahupot sang baboy sa nasambit nga babuyan kun sa diin apat diri ang iya ginahuptan.
Ginpahayag ni Blancaver nga wala man sang may nagareklamo magluwas lamang sa mag-iloy nga sanday Nanay Monica kag Russel Berano.
Dugang pa ni Blancaver nga indi man gid tuman ka baho ang ila nga babuyan bangud masami niya man ini ginatinloan.
Aminado man ini nga nakasimhot siya sang baho sang ila babuyan apang gilayon niya man ini ginalimpyohan.
Magluwas diri, may yara man sang buho sa ila tangkal kun sa diin nagailig ang higku pakadto sa uyapad.
Nahibaluan nga wala pa ang balay sang mga tagreklamo yara na ang nasambit nga babuyan sa lugar.
Samtang, ginpahayag naman ni Blancaver nga kasubong ginapersonal na lamang ini sang mga tagreklamo bangud sa indi manami nga mga tinaga nga ginahaboy sa iya.
