Nalab-ot na sang mga responder sang gobyerno ang mga lugar nga una nga na-isolate matapos ang magnitude 7.8 nga linog nga nagtay-og sa Mindanao sang Hunyo 8, suno sa Office of Civil Defense (OCD).
Suno kay Junie Castillo, spokesperson sang OCD, bisan may mga lugar na nga nalab-ot, nagapabilin nga daku nga problema ang pagsulod sa pila ka bahin sang Soccsksargen bangud sang mga naguba nga dalan kag mga taytay.
Bangud sini, nagagamit ang mga awtoridad sang mga sakayan kag alternatibo nga mga rota agud madala ang relief goods sa mga naapektuhan nga komunidad.
Padayon man ang pagpanagtag sang pagkaon, mga tolda, gasolina kag iban pa nga nagapanguna nga kinahanglanon, samtang ginpasiguro sang Department of Social Welfare and Development (DSWD) nga bastante ang suplay sang pagkaon para sa mga apektado nga residente.
Samtang, nagsaka na sa 45 ang mga napatay suno sa OCD, samtang walo naman ang ginreport nga wala gihapon makit-an sa rehiyon sang Soccsksargen.
Narekord man ang pagkaguba sang 18 ka taytay kag 41 ka mga dalan, samtang may anum ka insidente sang landslide.
Labaw sa 130,000 ka konsumedor ang wala pa gihapon sang kuryente kag 47 ka gasolinahan ang wala pa makabalik sa normal nga operasyon.
Padayon man ang inspeksyon kag assessment sang mga establisyemento kag mga building, samtang linibo ka residente ang nagapabilin sa mga evacuation center kag temporaryo nga mga tolda bangud sang padayon nga mga aftershocks.
