ROXAS CITY – Ginalauman nga magasugod na ang operasyon sang isolation facility para sa mga asymptomatic patients ang Capiz Gymnasium, Villareal Stadium.
Ini ang ginpahayag ni Dr. Ramon Alex Nolasco, head sang Hospital Management Services sang mainterview sang Bombo Radyo.
Ginpahayag ni Nolasco nga may pila na lamang ka mga butang nga ginahitsu agud makabaton na sang mga pasyente ang amo nga pasilidad nga ginalauman magasugod na sa masunod nga semana.
Suno kay Nolasco nga mga asymptomatic patients gid lamang ang sarang nga mabaton sa pasilidad kag sa tion nga matapos naman ang 14-day quarantine gilayon man sila nga paguwaon.
May yara man sang doctor nga maga-issue sa ila sang certificate of completion agud pamatuod nga tapos na ang ila quarantine kag hilway na sila sa virus.
Samtang, ginpasiguro naman sini nga indi makaguwa ang mga pasyente sa amo nga pasilidad kun yara pa ini nagapaidalom sa quarantine.
Suno kay Nolasco nga may yara sang mga kapulisan nga magabantay sa pasilidad.
Nahibaluan nga may yara naman ini sang pahanugot nagikan sa Department of Health (DOH) nga mahimo na maggamit ang nasambita nga pasilidad kag suportado man ini sang sektor sang medisina sa probinsiya.
