ROXAS CITY – Plano nga ipatukod ang isolation rooms with negative pressure para sa mga pasyente nga may makalalapon nga balatian sa Roxas Memorial Provincial Hospital (RMPH).
Ini ang ginpahayag ni Mr. Jeoffrey Espiritu, Development Management Officer IV kag tagpamaba sang Department of Health (DOH)-Capiz sang ma-interview sang Bombo Radyo.
Suno kay Espiritu, nakighinun-anon siya kay Dr. Florencio Luching nga amu ang hepe sa karon sang RMPH kag gindiskusyunan ang mga resikitos ukon dokumento nga kinahanglan nila agud maumpisahan na ang pagpatindog sang nasambit nga proyekto nga ipahamtang sa 3rd floor sang ospital.
Gintuad sini nga kabahin sang worldbank covid-19 emergency response project ang pagtukod sang isolation rooms kun sa diin matigayon kun masumiter ang nagakaigo nga dokumento kaangay sang MOA kag mapirmahan sang provincial government nga ipasa naman sa Department of Health (DOH) agud maimplemetar.
Para ini sa infectious patient nga kinahanglan ipain agud indi makapanlapon pa sang balatian kaangay sang covid confirmed cases kag tuberculosis (TB).
Sa pihak nga bahin, ba-se sa ila datos nakapagkit ang probinsya sang 40 ka aktibo nga kaso sang Covid-19 sa adlaw sang Hulyo 14 kun sa diin suno diri amat-amat nga nagasaka ang kaso, gani padayon man ang pagpabantay ni Governor Fredenil Castro sa mga kapulisan kag LGU sa iya ginpatuman nga pag-obserbar sang minimum health protocols sa pumuluyo.
Panugyan ni Espiritu, sundon tanan ang ginapatuman kag magkooperar sa pagtapna sang mga balatian bangud kada isa ang may obligasyon agud mapabilin ang maayo nga ikaayong lawas sang Capiznon.
