Nagpahayag ang Israel nga preparado ini nga ibalik ang Iran sa “dark ages,” samtang nagapadayon ang pagpasangkad sang tensyon sa tunga sang duha ka pungsod.
Ini ang ginpahayag ni Israeli Defense Minister Israel Katz, nga nagsiling nga handa ang ila militar sa pagbalik sang opensiba batuk sa Iran.
Ginpahayag man ni Katz nga “The targets are marked” kag nagahulat na lang sila sang pag-apruba sang Estados Unidos antes ipadayon ang operasyon.
Suno pa sa iya, ang tinutuyo sang Israel amu ang dalayon nga pagpatumba sa liderato ni Khamenei.
Samtang, ginapaabot nga magapakigsapol si Israeli Prime Minister Benjamin Netanyahu kaupod ang mga mataas nga opisyales sang gobyerno agud talakayon ang sitwasyon sa Israel kag Lebanon.
Nagapadayon man ang paglala sang tensyon sa tunga sang Estados Unidos kag Iran.
Lakip sa mga insidente amu ang pag-agaw sang US sa mga barko nga ginapatihan may dala nga langis halin sa Iran, samtang ginpasirado liwat sang Iran ang Strait of Hormuz.
Sa pihak sang nauna nga mga pag-atake sang Israel nga nagresulta sa kamatayon sang pila ka matag-as nga opisyal sang Iran, nagapabilin nga matig-a ang gobyerno sang Iran.
Apang nagpaandam si Katz nga ang masunod nga pag-atake magapakita sang mas mabaskog nga pagkaguba kag kapyerdehan.
