Nagdeklarar ang Israel sang temporaryo nga pag-untat sa opensiba sa pila ka bahin sang Gaza agud tugutan ang dugang nga pag-agi para sa United Nations (UN) kag humanitarian aid convoys, sa tunga sang nagalala nga krisis sa kagutom sa rehiyon.
Suno sa militar sang Israel, ang ginatawag nga “tactical pause” ang magasugod adlaw-adlaw halin alas 10:00 sang aga tubtob alas 8:00 sang gab-i. sa mga lugar nga wala na sang aktibo nga operasyon militar, pareho sang Al-Mawasi, Deir el-Balah, kag Gaza City.
Ginpahanugutan man ang mga secure nga ruta para sa pagdul-ong sang pagkaon kag bulong.
Sa amo man nga tion, ang Israel nagpatigayon man sang mga food airdrops, samtang ang United Arab Emirates kag ang United Kingdom nagpabutyag sang suporta kag naghatag liwat sang bulig gikan sa Gaza. Apang, ang pila ka humanitarian groups nagkwestyon sang epekto, nga nagapamilit nga ang mga air drops indi bastante sa pagsulbar sang lapnag nga kagutomon ukon krisis.
Apisar nga may yara sang mga tikang, kapin sa 50 ka mga tawo ang ginreport gihapon nga napatay sang Sabado sa ginaalegar nga mga airstrike kag shelling sang Israel, suno sa Palestinian civil defense.
Nagdugang ang tensyon matapos nga gin-intercept sang mga soldado sang Israel ang isa ka barko nga may sakay nga mga aktibista nga pro-Palestinian nga nagtinguha nga gub-on ang naval blockade.
Madumduman nga ang kagutuman nga naeksperyensyahan naglala pagkatapos sang total blockade nga ginpatuman sang Israel sang Marso sini nga tuig, nga naghimo sang pagsulod sang bulig sa duta nga mabudlay kag madamo nga mga lugar ang indi ma-access bangud sang estrikto nga kontrol sang militar.
