Nanindugan si Israeli Prime Minister Benjamin Netanyahu nga ipadayon sang Israel ang pag-atake sa militante nga grupo nga Hezbollah sa Lebanon.
Ini ang tubtob sa makuha nila ang ila nga tuyo sa gyera nga maibalin ang mga na-displace nga mga sibilyan nga Israelis sa ila nga mga puluy-an sa northern border.
Dugang man sang Israeli PM sa pumuluyo sang Lebanon nga indi sila ang punterya sang gyera kag ginpaandaman ang ini batuk kay Hezbollah leader Hassan Nasrallah.
Suno naman kay Israeli military spokesman Rear Admiral Daniel Hagari, ginhimo na suno sang Hezbollah ang southern Lebanon kag Bekaa Valley nga isa ka combat zone.
Ginsiling man ni Hagari nga napatay sa airstrike sa southern suburbs sang Beirut ang Hezbollah misile and rocket unit commander nga si Ibrahim Qubaisi sang hapon sang tinalikdan nga adlaw sang Martes kaupod sang 2 ka iban pa nga commanders. Ginkumpirmar naman sang Hezbollah ang pagkamatay ni Quibaisi.
Si Quibaisi ang isa ka key figure sa pag-activate sang mga missile kag responsable sa pila ka serye sang pag-atake sa mga teritoryo sang Israel.
Sa karon, nagdangat na sa 558 ka tawo ang napatay samtang yara na sa 1,835 ka tawo naman ang nabalhag nga napilasan sa ginlunsyar nga airstrike sang Israel sa southern Lebanon kag eastern Beka valley.
