ROXAS CITY – Ginpatuman na ang mas hugot kag istrikto nga implementasyon sa mga border security kag quarantine protocols sa probinsya sang Capiz.
Ini bangud sa padayon nga pagsaka sang kaso sang Coronavirus Disease 2019 (COVID19) sa Pilipinas.
Sa interview sang Bombo Radyo Roxas kay Capiz Governor Esteban Evan “Nonoy” Contreras” II, ginpahayag sini nga indi na mahimo nga makasulod sa entrance kag exit point sang probinsiya ang sin-o man nga mga indibidwal gikan sa iban nga mga kaprobinsyahanan agud masiguro nga hilway sa COVID-19 kag indi mabutang sa peligro ang kabuhi sang mga Capizeño.
Magluwas lamang sa mga empleyado sang nasyunal kag lokal nga gobyerno sa diin pahanugutan sila nga makasulod sa probinsiya suno sa gobernador kun ang mga ini ang magahatag sang serbisyo sa publiko kag kinahanglan nga maka-presentar sang valid ID kag aprubado ang Travel Order nga nasaad ang ila katuyuan sa pagsulod sa probinsiya.
Subongman sa mga pasyente nga nagapa-chemotheraphy kag hemodialysis sa Capiz kinanglan lamang nga mag-presentar sang health certification kag valid referral gikan sa doktor.
Pag-abot naman sa mga negosyante ukon bolante gin-athag ni Contreras nga dapat lamang magdala sang certified true copy sang DTI Permit/Mayor’s Permit kag Delivery Receipt nga makapamatuod sang ila negosyo ukon produkto nga ginadala ukon ginapasulod sa probinsya.
Kinahanglan man nga magpakita sang health clearance ukon health declaration ang magasulod sa probinsiya.
Magluwas diri, kinahanglan man nga magpaidalum sa quarantine protocols sa diin pagatsekyaron kun may yara ini sang lagnat ukon flu like symptoms ang mga indibidwal nga nagasulod sa probinsya.
Mahibaluan nga sandig sa Memorandum Order No.36-A sang gobernador, ang magkatuhay nga mga ahensiya sang gobyerno ang nagabuligay sa pag-implementar sang Executive Order No. 11, Series of 2020.
