Ginapanindugan sang gobernador sang probinsiya sang Capiz nga importante sa gihapon ang istrikto nga implementasyon sang mga minimum health protocols, agud matapna ang pagtaas sang numero sang COVID-19.
Ginpahayag ni Governor Esteban Evan Contreras II, bisan ipaidalum sa re-classification ang quarantine status sang isa ka lugar kun madamo sang salawayon kag indi pag-istriktuhon ang pagpatuman sang health protocols, mangin wala ini sang pulos sa gihapon.
Suno sa opisyal nga naalarma man ang Inter-Agency Task Force sa nakita nga pagtaas sang kaso sang COVID-19 sa pihak nga ginpaidalum na sa Modified Enhanced Community Quarantine (MECQ) ang Roxas City.
Ginmandu man sang ahensiya nga pasangkaron pa ang monitoring sa syudad kag hugot nga ipatuman ang minimum health protocols sa Roxas City agud ma-contain ang virus.
Importante man nga hugot nga dumilian ang pagtipon tipon bangud diri nagasugod ang paglapta sang virus.
Ginakunsidera man sang gobernador nga ipaidalum sa MECQ ukon General Community Quarantine ang pila ka mga banwa nga may mataas nga kaso, bangud kun ang probinsiya sang Capiz ang hinyuon nga i-reclassify ang quarantine status, sigurado nga indi pag-aprubahan bangud indi malab-ot ang parameters nga ginapangita sang ahensiya.
Suno pa sa amay sang probinsiya nga nagpanugyan man ang IATF nga dapat kun may magpositibo sa COVID-19, kinahanglan madasig nga magpatigayon sang contact tracing sa sulod sang 24 oras, agud indi makaguha ang na-close contact sang mga nagpositive.
Samtang ginkumpirma sang gobernador nga nagrequest na ini sa DOH-6 sang dugang nga nurses kag bukas man ang Roxas Memorial Provincial Hospital sa pagbaton sang maga-apply nga mga nurses, bangud sa karon kulang gid ang mga nurses sa amo nga ospital bangud sa COVID-19 cases.
Naga-akomodar naman sa karon sang COVID-19 patients ang Bailan kag Mambusao District Hospital.
Ginpasiguro man sini nga pataasan ang sweldo sang mga nurses kag may yara sang ginasuksok nga PPEs ang mga naga-tatap sa mga COVID patients.
Nahibaluan man nga kalakip ang Capiz sa makabaton sang dugang nga vaccines bangud may yara sa ultra low freezer ang probinsiya.
